رواية نوفيلا الفصل الثاني والثالث بقلم صديقة القلم

الحلقة الثانية.......
سلوي قفلت الباب بعد جارتها ام سامي لما مشيت وهي مستغربه أن فى حد كدة ومكنتش مستريحة لاسلوبها في الكلام وثقتها بانهم صعب حد يرفضهم وفي الاخر دخلت سلوي المطبخ تكمل اللي كانت بتعملة بس عقلها في كل الكلام اللي اتقال .... 
وصل مصطفي البيت واتعشا وشرب الشاي وكلة بقي تمام وجت سلوي جنبة وقالتلة كنت عايزة احكيلك علي حاجة ومردتش اتصل بيك وقولت استني لما تيجي ..
مصطفي _ اية اللي حصل مالك شكلك مضايق ولا انا بيتهيألي
سلوي _ مش عارفة بس هحكيلك علي اللي حصل كلة
مصطفي _ قولي واهدي في الاول.

سلوي _ حكت كل حاجة زي ما حصلت بالظبط وفي الاخر قالتلة أن الست كانت بتتكلم بغرور وحسيت في كلامها أن هي الأمر الناهي في البيت وكلة متوقف عليها 
مصطفي_ لية قلقانة مافيش حاجه بالڠصب لو معجبناش هنقولهم مافيش نصيب وخلص الموضوع.
سلوي _ انا مش مستريحة تخيل بتقولي لو عجبتني اكيد هتعجب سامي 
مصطفي _ متكبريش الموضوع هي ام وتلاقيها بس عايزة تطمن علي ابنها
سلوي _ طب والعمل اية دلوقتي 
مصطفي _ قولي لبنتك وشوفيها وكلمي الست وحددي ميعاد وخليهم يجوا للتعارف وبعدها نقرر
سلوي _ انا هقول لمنة لكن مش هتصل بالست لو هى اتصلت خلاص ماشي لو ما اتصلتش تسأل مش هدور وراها وتبقي جت من عند ربنا.
مصطفي _ خلاص اللي يريحك الموضوع مش محتاج كل القلق دة 
سلوي _ بصي يا منة جالك عريس ومامتة جت عايزة تشوفك بس انا أجلت الموضوع لحد لما تبقي جاهزة وتقوليلي رايك ومتتكسفيش انتي لسة صغيرة وعندك ٢٢ سنة يعني لسة بدري ومحدش هيغصبك علي حاجة.
منة _ طب هو شافني فين
سلوي _ هو يا قلبي مشافكيش هي مامتة اللي سمعت عننا وعايزة تشوفك الاول 
منة _ وهو مش عايز يشوفني 
سلوي _ لو مامتة وافقت عليكي هيشوفك 
منة _ وبابا راية اية
سلوي _ قال تقعدي معاة وبعدها قرري عشان منحكمش علي حد من برة 
منة _ خلاص ماشي يا ماما بالرغم أن اسلوبهم غريب 
سلوي _ لما نشوف لو مامتة اتصلت هخليهم يجوا بكرة اخر النهار 
منة _ زي ما تحبي 
اتصلت ام سامي بسلوي تاني يوم ...
ام سامي_ ازيك يا ام العروسة 
سلوي _ اهلا يا حاجة ازيك 
ام سامي_ جهزوا نفسكوا احنا جايين دلوقتي عشان نشوفكوا وسامي معايا 
سلوي _ اهلا وسهلا تشرفوا.
سلوي قفلت وكلمت مصطفي زوجها تقولة علي اللي حصل وانة لازم يجي ...
عدت الساعة ٥ وجت ام سامي وابنها سامي ... 
سلوي _ اهلا وسهلا بيكوا نورتوا
ام سامي_ اهلا بيكي دة نورك
سلوي _ ازيك يا سامي 
سامي _ تمام الحمد لله
ام سامي_ فين العروسة عشان مستعجلين