رواية وهم الفصول من 25-28

هي الزوجة الرسمية لعزام ووالدة ابنه الوحيد الذي سيكون وريثا لتلك الإمبراطورية.
سمع محمد صوت طرقات على باب شقته فنهض من مكانه وتوجه نحو الباب حتى يفتحه ووجد أن الطارق هو ابن عمه الذي أتى إليه حاملا حقيبة ملابسه.
نظر محمد بذهول نحو ابن عمه قائلا بمزاح وهو ينظر إلى الحقيبة الكبيرة التي يجرها آدم خلفه
إيه يا عم آدم الشنطة العملاقة دي كلها!! هو أنت مهاجر ولا إيه!!
رمقه آدم بحدة ورد بغيظ وهو يجلس على الأريكة
لا يا أخويا مش مهاجر ولا حاجة كل الموضوع هو أني جاي أقعد عندك الفترة دي لحد ما نادين تخلي عندها ډم وتسيب الشقة.
ارتسمت الصدمة على وجه محمد وتمتم بصوت منخفض لم يسمعه آدم
تقعد عندي فين يا أخويا!! هي المشرحة ناقصة چثث!!
رفع محمد حاجبيه باستنكار وهو يفكر في طريقة تجعله يقنع ابن عمه بالعودة إلى شقته وابتسم بعد بضع ثوان بعدما خطرت له فكرة ذكية.
جلس محمد بجوار آدم وربت على كتفه متظاهرا بدعمه لموقفه قائلا
أنت عندك حق تزهق منها الصراحة بس فكر معايا كده هي دلوقتي قاعدة في شقتك وأنت اللي سايب البيت وواخد شنطة هدومك ودي عيبة في حقك لأن المفروض العكس هو اللي يحصل.
زفر آدم بحنق متسائلا بنفاذ صبر فهو على وشك أن يشد شعره من فرط الڠضب الذي يشعر به نتيجة لبرود أعصاب نادين التي رفضت الخروج من شقته رغم تطليقه لها
طيب وإيه الحل اللي أنت شايفه صح من وجهة نظرك أنا مش طايق أشوف وشها ولا أسمع صوتها وهي مصممة تقعدلي في البيت زي اللازقة وبتقول مش هتخرج منه غير لما العدة تخلص وأني لو حاولت أخرجها بالعافية ساعتها هكون ارتكبت ذنب كبير.
أومأ محمد وبدأ يتحدث بأسلوب هادئ حتى يقنع ابن عمه بالرجوع إلى منزله دون أن يشعر بعدم ترحيبه بوجوده هنا في شقته
هي فعلا عندها حق في نقطة أنك مش هينفع تخرجها من البيت وأنها لازم تستنى أما شهور العدة تخلص بس ده مش معناه أنك تستسلم يا بطل أنت المفروض أول حاجة تعملها دلوقتي هي أنك ترجع على شقتك وتتفنن في أنك تزهقها في عيشتها وساعتها هي اللي هتسيب الشقة وهتمشي وأنت وقتها هترتاح.
فكر آدم قليلا في حديث ابن عمه واقتنع بوجهة نظره وقام بالفعل بحمل حقيبته وغادر شقة محمد.
ابتسم محمد بارتياح لأن خطته قد نجحت وعاد آدم إلى منزله وهذا الأمر قد يساهم بشكل كبير في حل الخلاف القائم بينه وبين نادين أكثر بكثير مما سيحدث لو مكث كل منهما في مكان بعيد عن الأخر
دلفت إلهام إلى غرفة نوم رامز حتى توقظه من النوم وأخذت تهزه برفق وهي تقول
قوم يلا يا رامز الساعة تسعة وأنت لسة نايم لحد دلوقتي!!
تأفف رامز وفتح عينيه قائلا بانزعاج
فيه إيه بس يا ماما سيبيني أنام شوية أنا أصلا صحيت الساعة خمسة ونص وصليت الفجر حاضر.
شد رامز اللحاف عليه لكي ينعم بقسط إضافي من النوم ولكن قامت إلهام بسحب اللحاف هاتفة بصرامة
بطل كسل يا ولد أنت ويلا قوم عشان تفطر أنا صاحية بقالي ثلاث ساعات ومستنياك تصحى عشان نفطر سوا وأنت البعيد نايم ومش شاغل دماغك بأي حاجة.
نهض رامز وهو يردد بضيق
يا ستار يا رب عليك يا ماما أنت فعلا ساعات بيطلع منك حاجات غريبة في أوقات مش مناسبة.
لحق رامز بوالدته وجلس على السفرة وأخذ يتناول الفطور تحت نظرات إلهام التي كشفت له أنها تريد أن تسأله عن شيء ولكنها لا تعرف من أين تبدأ.
وضع رامز الشطيرة التي كان يمسك بها جانبا ونظر إلى أمه قائلا
يلا يا حبيبتي اتكلمي وقولي أنت عايزة إيه لأن أنا عارف كويس أنك صحيتيني من النوم رغم أن النهاردة أجازة مش عشان أفطر زي ما أنت اتحججتي.
هزت إلهام رأسها وأكدت صحة ظنه بقولها
عندك حق يا رامز أنا عايزة أتكلم معاك في موضوع مهم وهو متعلق بسمية عايزة أعرف أنت وصلت لحد فين في الموضوع ده
استغرب رامز كثيرا من اهتمام والدته بهذا الأمر بعدما اعترضت عليه في البداية
وأنت إيه اللي غير رأيك دلوقتي بخصوص سمية
أجابت إلهام بصراحة وهي تبتسم
قعدت أفكر شوية في الموضوع ولقيت أن نادين اتجوزت من زمان والموضوع بتاعكم اتقفل خالص ومحدش بقى بيتكلم فيه ومفيش مانع أن أنت وسمية تتجوزوا وخصوصا أني لما شوفتها لقيتها بنت جميلة جدا ومحترمة وأنا شايفة أنها مناسبة ليك.
قهقه رامز متسائلا بلطف
أيوة بقى قولي بقى من الأول أنك شوفتيها وأنها عجبتك بس أنا مش فاهم أنت شوفتيها فين
أخبرته إلهام عما حدث في اليوم الذي رأت به نادين وهي تشتري فستانا تحضر به خطبة محمد وكانت سمية برفقتها.
تنهدت إلهام وهتفت وهي تقوم برفع الأطباق من فوق المائدة
ربنا يصلح الأحوال بين نادين وآدم ويوفقك ويجمع بينك أنت وسمية.
ابتسم رامز لأنه تخلص من مسألة عدم اقتناع والدته