رواية ممتعة جدا الفصول من الاول للرابع بقلم الكاتبة الرائعة

بتحبه الحب دا كله ممكن يكون بيحب حد غيرها قلبها رافض يصدق الحقيقة دى وحست ساعتها بۏجع لمجرد وجود الفكرة
ماجد ها ساكتة ليه
ريم بصراحة مش عارفة مفكرتش فى الاحتمال ده. انا كل الى فكرت فيه انى ابقى عادلة مع نفسى واخليه يشوف حبى بس لو زى ما انت بتقول مبادلنيش نفس المشاعر بعد ما عرف ساعتها انا اكيد مش هفرض نفسى عليه وهعرف انى مليش مكان فى حياته وهنسحب فورا وبدون رجوع
ماجد بصلها وسكت
ريم مالك يا دكتور
ماجد ممكن اسألك سؤال
ريم طبعا اتفضل
ماجد هو الشخص الى بتتكلمى عليه هو ابن عمك الى اتخانقت معاه
ريم بفزع عصاااااااام لا طبعا هو صحيح عصام بيحبنى بس بالنسبة لى هو ابن عمى وبس
ماجد تمام. طب بصى يا ريم انا هساعدك انك تحاولى تلفتى انتباه الشخص الى بتحبيه ليكى عشان يقدر يشوف المشاعر الحلوة الى جواكى 
ريم بفرحة بجد يا دكتور
ماجد بجد بس هتعملى زى ما بقولك
ريم اكيد وانا مع حضرتك فى اى حاجة
ماجد خلاص يبقى تجيلى تانى يوم الاتنين الجاى ونقعد مع بعض تانى واكون ساعتها فكرت ازاى تقدرى تلفتى انتباه حبيبك ليكى
كانت ريم نفسها فى اللحظة دى نفسها تقوله ان هو حبيبها وهو الى نفسها يعرف بحبها ليه بس مقدرتش 
ماجد ها اتفقنا 
ريم اتفقنا
ماجد بس عايز آكد عليكى تانى 
ريم عارفة يا دكتور دا هيبقى مجرد لفت انتباه
بتخرج ريم من عند ماجد فرحانة مش بس لانه قرر يساعدها لكن لان وجوده جنبها فى حد ذاته بيسعدها وبيخليها مبسوطة. روحت ريم على بيتها واول ما دخلت سلمت على باباها
ريم مساء الخير يا بابا
على مساء النور يا ريم. كنتى فين لحد دلوقتى
ريم بتردد كنت عند الدكتور يا بابا
على بقلق دكتور دكتور ايه يا ريم خير انتى تعبانة ولا ايه
ريم متخافش يا بابا انا كنت عند دكتور السنان ضرسى وجعنى بس روحت اكشف عليه
على وعاملة ايه دلوقتى يا ريم
ريم الحمد لله احسن يا بابا. وليد مكلمش حضرتك
على لا كلمنى الصبح وبيسلم عليكى كتير
ريم برضه مش ناوى ينزل اجازة 
على بيقول نازل قريب بس انتى عارفة اخوكى وكلامه
ريم ياريت ينزل بقى لانه بجد واحشنى اوى
على ومين سمعك ياريم
ريم طب يا بابا عن اذن حضرتك هدخل استريح فى اوضتى
ريم بتدخل اوضتها وبتقعد على السرير تفكر فى ماجد وصورته وكلامه ليها 
ريم فى نفسها يا ترى يا ماجد هتقدر تساعدنى انى اخليك تحس بحبى ليك ولا هتفشل
الفصل الثاني
تانى يوم فى النادى
ريم بتروح لندى الى بتستناها بلهفة عايزة تعرف عملت ايه
ريم صباااااااااح الخير
ندى يا سيدى على الروقان صباح النور يا سندريلا طبعا جاية ولا على بالك
ريم بهدوء ايه بس يا نودى زعلانة ليه على الصبح
ندى انا يا بت انتى مش قولتلك كلمينى عشان اطمن عملتى ايه امبارح وكمان بكلمك من امبارح مبترديش عليا
ريم بهيام معلش يا نودى مكنتش عايزة اكلم حد امبارح كنت عايزة اخر صوت يفضل فى ودنى صوته واخر كلام انام بعده كلامه
ندى امممم. طب عملتى ايه يا ست جوليت ما سى روميو بتاعك
ريم معملتش حاجة رحت واتكلمنا شوية وحددلى ميعاد تانى عشان نتقابل فيه
ندى يا سيدى على المواعيد الى بتتاخد بالسرعة دى
ريم لا يا اختى عقلك ميروحش لبعيد دا ميعاد عشان يكمل شغله معايا مش اكتر دا طلع مش فاكرنى اصلا
ندى ايه ده معقولة ! انا لما شفت الفرحة الى فى عينيكى قولت حصل تطورات
ريم يا ندى كونه قريب منى دا يخلينى طايرة مش فرحانة بس
ندى للدرجة دى يا ريم
ريم واكتر يا ندى . استنى استنى دا جى هناك اهو
ريم شافت ماجد وهو رايح تدريب التنس بتاعه جريت عليه وبتندهله
ريم دكتور ماجد... دكتور ماجد
ماجد لف وبصلها
ريم صباح الخير يا دكتور
ماجد صباح النور ازيك النهاردة يا انسة ريم
ريم الحمد لله كويسة ايه الصدفة الحلوة دى
ماجد هى فعلا صدفة انا باجى النادى كل يوم
ريم باندفاع اه ما انا عارفة عشان تدريب التنس بتاعك
ماجد بصلها باستغراب
ريم بلخبطة يعنى كنت بشوفك من وقت للتانى رايح ناحية ملعب التنس فخمنت صدفة مش اكتر
ماجد اه تمام
ريم طب حضرتك فكرت فى الموضوع بتاعى
ماجد موضوع ايه.... اه ازاى تلفتى انتباهه
ريم حركت راسها بالموافقة
ماجد بصراحة موضوعك شغل تفكيرى كتير انا تقريبا طول الليل منمتش بفكر فيه
ريم بابتسامة بجد !
ريم فى نفسها اهو على الاقل حاجة من ريحتى بتشغل تفكيرك
ريم ولقيتلى حل يا دكتور
ماجد هو مش حل حل هى فكرة هقولك عليها يمكن تنفع معاه
ريم عظيم طب ايه هى الفكرة يا دكتور
ماجد بصى انا للاسف مستعجل دلوقتى عشان عندى ماتش تنس لكن لو مستعجلة اوى عشان تعرفى الفكرة ممكن تستنينى لحد ما اخلص الماتش وانا هقولك عليها علطول ولا انتى مستعجلة
ريم باندفاع لا مستعجلة ايه هستناك طبعا
ماجد بصلها باستغراب
ريم انا قصدى هستنى حضرتك عشان اعرف الفكرة انا بصراحة متشوقة اعرفها واشوف هتجيب نتيجة